काठमाडौं । अर्थमन्त्री डा रामशरण महतले चीनको सहयोगमा सञ्चालित विकास आयोजनाको काम छिटो गर्न चीन सरकारसँग आग्रह गरेका छन् । नेपालका लागि चीनका राजदू्च ऊ चुन्ताईसँगको भेटमा मन्त्री महतले यस्तो बताएका हुन् ।
अर्थमन्त्री महतले काठमाडौंको चक्रपथ बिस्तार, रसुवागढी र तातोपानी, बेनी जोमसोम सडकको स्तरोन्नति तथा पोखरा विमानस्थलको निर्माणका काम छिटो पूरा गर्न आग्रह गरेका हुन् ।
‘चक्रपथको निर्माणलाई सबैतिरबाट काम सुरु गरेर छिटो पूरा गर्नुपर्ने आवश्यकता छ,’ मन्त्री महतले भने, ‘तातोपानीको नाका साँघुरो भएकोले उत्तरतिर जोड्ने अर्को नाका खुला भैसकेको अवस्थामा रसुवागढी र तातोपानीको पनि सडकको स्तरोन्नति छिटो गर्नुपर्ने र बेनी जोमसोम सडकको बिस्तारसहित निर्माण कार्य छिटो पूरा गर्नुपर्ने आवश्यक भैसकेको छ ।’
भेटमा अर्थमन्त्री महतले भैरहवा विमानस्थलको काम सुरु भैसकेको भन्दै पोखराको क्षेत्रीय विमानस्थलको काम पनि छिटो सुरु गर्नुपर्नेमा जोड दिए । नेपालमा लगानी गरी चीनले धेरै फाइदा लिनसक्ने भन्दै मन्त्री महतले नेपालको बजार मात्र नभइ नेपाल हुँदै चीनले दक्षिण एसियाली देशहरुमासमेत आफ्ना उत्पादन निर्यात गर्न सक्ने बताए ।
‘कम विकसित देशको सुविधा नेपालले प्राप्त गरेकोले युरोप तथा अमेरिका जस्ता मुलुकमा पनि निर्यात गरेर धेरै फाइदा लिन सकिन्छ’ महतले भने, ‘त्यसैले बजार सानो छ भन्ने कुरै छैन ।’
भेटमा चुनताईले चीनले अन्य मुलुकहरुसँग जसरी नै नेपालसँग पनि स्वतन्त्र व्यापार क्षेत्र सम्बन्धी सम्झौता गर्न चाहेको जानकारी दिए । राजदूत चुनताईले चीनले नेपालमा संयुक्त लगानीमा औद्योगिक क्षेत्र तथा सूचना प्रविधि पार्क स्थापना गर्न चाहेको पनि बताए ।
भेटमा अर्थमन्त्रालय तथा चिनियाँ दूतावासका अन्य अधिकारीहरुको पनि उपस्थिती थियो ।
