काठमाडौं । शिखर इन्स्योरेन्स कम्पनी लिमिटेडले प्रिमियममा नयाँ सेयर निस्कासन गर्ने भएको छ । कम्पनीले करिव पाँच करोड रुपैयाँ बराबरको नयाँ सेयर निस्कास गर्न लागेको हो ।
कम्पनीमा अहिले ८० प्रतिशत संस्थापक र २० प्रतिशत सर्वसाधारण सेयर छ । कम्पनीले गत चैतमा दुई बराबर एक हकप्रद सेयर निस्कासन गरेको थियो ।
हामी चाँडै एफपिओ निस्कासन गर्ने तयारीमा छौं, निस्कास गरिने सेयरमा कति प्रिमियम लिने भनेर मूल्यांकन गर्ने काम भइरहेको छ ।
—
—
हकप्रद निस्कासन गरेपछि कम्पनीको १७ करोड ५० लाख रुपैयाँको चुक्ता पुँजी ३० करोड ६२ लाख ५० हजार रुपैयाँ पुगेको थियो ।
कम्पनीले २० प्रतिशत सेयर दिने प्रस्ताव गरिसकेको छ । आगामी फागुन २२ गते हुने बार्षिक साधारणसभाले वोनस सेयर अनुमोदन गरेपछि कम्पनीको चुक्ता पुँजी ३६ करोड रुपैयाँ नाघ्ने छ ।
‘हामी चाँडै एफपिओ निस्कासन गर्ने तयारीमा छौं,’ कम्पनी सञ्चालक समितिका अध्यक्ष विकास राणाले शुक्रबार विजमाण्डूसँग भने, ‘निस्कास गरिने सेयरमा कति प्रिमियम लिने भनेर मूल्यांकन गर्ने काम भइरहेको छ ।’
कम्पनीले साधारणसभाबाट अनुमोदन गरेपछि एफपिओको प्रकृया सुरु गर्ने छ । कम्पनीले साधारणसभा सकेको दुई महिनाभित्र एफपिओ निस्कासन गर्ने योजना बनाएको छ ।
कम्पनीले सर्वसाधारणको तर्फबाट थप १० प्रतिशत सेयर जारी गर्ने छ । प्रारम्भिक मूल्यांकन अनुसार, कम्पनी एक सय रुपैयाँ अंकति दरका सेयरमा कम्तिमा तीन सय रुपैयाँ प्रिमियम थपेर चार रुपैयाँको हाराहारीमा सेयर जारी गर्ने पक्षमा छ । ‘अन्तिम निर्णय मूल्यांकन प्रतिवेदन आएपछि गर्छौ,’ कम्पनी स्रोतले भन्यो, ‘नियामक निकाय बिमा समितिले दिने राय पनि महत्वपूर्ण हुन्छ ।’
प्रिमियम वापत आएको रकम जगेडा कोषमा जाने छ । कम्पनी अर्को बर्षसम्म नाफा बढाएर पुँजी ५० करोड र रिजर्भ अर्को ५० करोड पुर्याउने योजनामा छ । अहिले कम्पनीको जगेडा कोषमा ११ करोड रुपैयाँ छ ।
गत असोजसम्मको वित्तीय विवरण अनुसार कम्पनी दुई करोड ९१ लाख रुपैयाँ खुद नाफामा छ । कम्पनीले नेपाल स्टक एक्सचेन्जमा विहीबार बसेको सञ्चालक समितिको ११२औं बैठकको निर्णय भन्दै प्रिमियममा सेयर जारी गर्ने जानकारी गराएको छ ।
