काठमाडौं । सरकाले उखुको मूल्य निर्धारण गरेको छ । उद्योग मन्त्रालयले उखुको न्यूनतम समर्थन मूल्य गत वर्षको भन्दा १५ रुपैयाँ कम अर्थात प्रति क्विन्टल चारसय ६१ रुपैयाँ तोकेको छ । गत वर्ष उखुको मूल्य चारसय ७६ रुपैयाँ प्रतिक्विन्टल थियो ।
चिनी उद्योगी तथा उखु किसानबीच उखुको मूल्यका विषयमा विवाद बढ्न थालेपछि मन्त्रिपरिषदको गत फागुन १४ गतेको बैठकले कृषि मन्त्रालयसँग समन्वय गरी उखुको मूल्य निर्धारण गर्न उद्योग मन्त्रालयलाई निर्देशन दिएको थियो ।
सरकारले चिनी उद्योगीहरुलाई तोकिएको मूल्यमा नै उखु खरीद गर्न आग्रह गरेको छ । चिनी उद्योगीहरुले उखुको मूल्य चारसय ११ रुपैयाँ भन्दा धेरै दिन नसकिने बताउँदै आएका छन् । भारत र ब्राजिलमा चिनीको मूल्य उल्लेख्य घटेको भन्दै उद्योगीहरुले यो वर्ष चारसय ११ रुपैयाँ मात्रै दिन सकिने बताए ।
उखु किसानहरुले भने लागत बढ्दै गएको भन्दै गत वर्षकै बराबर मूल्य पाउनुपर्ने बताउँदै आएका छन् । उखु किसान र उद्योगीबीच विवाद बढ्दै जाँदा कतिपय किसानहरुको बारीमा उखु सुक्न थालिसकेको छ ।
यसैबीच सरकारले उखु उत्पादन र प्रवर्द्धनमा किसानलाई दिँदै आएको खर्च किसानलाई उपलब्ध नगराउने निर्णय पनि गरेको छ ।