काठमाडौं । आइएमई ग्रुप अन्तर्गतको आइएमई अटोमोटिभ्सले अमेरिकी मोटरसाइकल कम्पनी युएम ब्राण्डको आधिकारिक विक्री सुरु गरेको छ । बुधबार काठमाडौंमा एक कार्यक्रम गरेर अमेरिकी उत्पादनको आधिकारिक विक्रेताका  रुपमा मोटरसाइकल विक्री सुरु गरेको जानकारी आइएमई अटोमोटिभ्सले दिएको छ ।

कार्यक्रममा आइएमई समूहका अध्यक्ष चन्द्रप्रसाद ढकालले सन् २००९ बाट अटोमोवाइल विजनेस सुरु गरेको समूहले मोटरसाइकलको विक्री सुरु गरेको भन्दै अब यो क्षेत्रमा पनि उत्कृष्ठ काम गर्ने बताए । अमेरिकी ब्राण्डसँग  काम गर्न पाउँदा आफूलाई निकै खुशी लागेको भन्दै ढकालले नेपालमा मोटरसाइकल पारखीका लागि उत्कृष्ठ बाइक आफूहरुले भित्र्याउने जानकारी दिए ।

यस्तै अमेरिकी कम्पनी युएमईका बिजनेश डेभलपमेन्ट डाइरेक्टर हुआन भिल्लागासले विश्वस्तरीय मोटरसाइकलहरु नेपाल भित्रिएको भन्दै यसले नेपाली ग्राहकको आवश्यकता पुरा गर्ने बताए । नेपालमा आइएमई समूहसँग साझेदारी गर्न पाउँदा आफूहरु सन्तुष्ट भएको उनले बताए ।

यस्तै युनाइटेड मोटर्स इन्डियाका डाइरेक्टर राजीव मिश्राले नेपाल दुई पांग्रे सवारी साधनका लागि ठुलो संभावना बोकेको बजार भएको बताए । उनले यस्तो बजारमा विस्वकै उत्कृष्ठ मोटरसाइकल भित्रिएको दावी पनि गरे ।

यस्तै आइएमई अटोमोटिभ्सका प्रमुख कार्यकारी अधिकृत कपिल सिवाकोटीले नेपाली बजारमा भर्खरै आएको यो मोटरसाइकल ग्राहकले खोजेजस्तै भएको बताए । उनले अहिले कम्पनीले काठमाडौंको गैह्रीधाराबाट सुरु गरेको मोटरसाइकलको व्यापार अब देशका ७६ ठाउँमा विस्तार गर्ने पनि जानकारी दिए ।

यस्तै आइएमई अटोमोटिभ्सले काठमाडौंको नाचघरमा विश्वस्तरीय एक्सक्लुसिभ शोरुम खोल्न लागेको पनि शिवाकोटीले जानकारी दिए । उनका अनुसार अहिले कम्पनीले १७ मोडलरका मोटरसाइकल नेपाली बजारमा ल्याउने बताए । ‘कतिपय मोडल आइसकेका छन्, कति अब आउँदै पनि छन्,’ उनले भने, ‘हामीले छिट्टै सबै मोडलका बाइक ल्याउनेछौं ।‘

शिवाकोटीले कम्पनीले एकसयदेखि तीनसय सिसीसम्मका मोटरसाइकल ल्याउने बताए । मोटरसाइकल र स्कुटर गरेर एकलाख ७२ हजारदेखि तीनलाख ८५ हजार नौसय ९९ रुपैयाँसम्म पर्ने उनले बताए । कम्पनीले अहिले नै तीव्र बजार विस्तार नगर्ने भन्दै शिवाकोटीले एक वर्षको अवधिमा तीनदेखि चारहजार वटा मोटरसाइकल ल्याउने बेच्ने बताए । उनले आफ्टर सेल्स सर्भिस  बलियो बनाउन आफूहले सबै सुविधा दिने पनि बताए ।
कम्पनीले भारतमा बनेका मोटरसाइकले नेपालमा ल्याएर बेच्नेछ ।