काठमाडौं । नेपाल चेम्बर अफ कमर्शले भ्याटको विवरण बुझाउने म्याद एक महिना थप्न आग्रह गरेको छ । चेम्बरले भूकम्पले उद्योग व्यवसाय अवरुद्ध हुन पुगेको जनाउँदै प्रत्येक महिनाको २५ गते भित्र बुझाउनु पर्ने भ्याटको विवरण एक महिना थप्न सरकारसँग आग्रह गरेको हो ।
चेम्बरले विपत्तिका कारण भन्सार नाकाबाट सामान छुटाउन नसकेका कारण उद्यमी व्यवसायीहरुले ठूलो मात्रमा डेमरेज शुल्क तिर्नुपर्ने अवस्था आएको जनाउँदै अतिरिक्त आर्थिक भार छुट तथा मिनाहा गर्न सरकारसँग आग्रह गरेको छ ।
चेम्बरले भूकम्प पिडितहरुलाई चेम्वर भवन परिसरबाटै र आवश्यक क्षेत्रमै गई राहत वितरणलाई निरन्तरता दिएको छ । चेम्बरले पिउने पानी, त्रिपाल, कम्बल, औषधी लगायत अति आवश्यकीय बस्तुहरुको माग उच्च रहेकोले यस्ता राहत सामाग्री उपलव्ध गराउन व्यवसायीसँग आग्रह गरेको छ ।
