केन्द्रीय बैंकमा एमाले कर्मचारीले आन्दोलन गरेर दैनिक कार्यसम्पादनमा वाधा पारेको जानकारी दिँदै गभर्नर नेपालले– यस्तो बेलामा तलब सुविधा वढाउन माग राखेको अर्थमन्त्रीलाई जानकारी गराएका थिए ।

गभर्नरको गुनासोपछि अर्थमन्त्री पौडेलले अहिलेको बेलामा आर्थिक माग पुरा गर्न नसकिने भन्दै त्यसै अनुसार अगाडि वढ्न सुझाव दिएका हुन् । ‘यस्तो बेलामा पनि तलब भत्ता वढाउन आन्दोलन गर्ने हो?,’ अर्थमन्त्रीको भनाइ उदृत गर्दै उनका एक सहयोगीले भने ।

गभर्नरले आन्दोलनरत कर्मचारीहरुलाई आर्थिक वाहेक सम्पूर्ण माग पुरा गर्न सकिने जानकारी दिएका थिए ।

गभर्नरले वैशाखको भुकम्पले अर्थतन्त्र थिलथिलो भएका बेला अहिलेको नाकाबन्दीले अर्थतन्त्र खुम्चिएको तथ्य बारे अवगत गराउँदै आर्थिक माग पुरा गर्न नसकिने बताएका थिए ।

गभर्नरको भनाइबाट आक्रोशित भएका एमाले कर्मचारीहरुले डा. नेपाललाई अवेर रातीसम्मै कार्यालयमा बन्धक बनाएका थिए । उनीहरुले अहिले पनि आन्दोलनलाई निरन्तरता दिइरहेका छन् ।

नेपाल राष्ट्र बैंक कर्मचारी संघका अध्यक्ष बसन्तराज पाण्डेले आर्थिक माग पुरा गराएर आगामी अधिवेसनमा पुनः अध्यक्ष जितिने विश्लेषणका साथ आन्दोलनलाई थप उग्र बनाउँदै लगिरहेका छन् ।

सत्तारुढ दल एमाले निकट कर्मचारी संघका अध्यक्ष पाण्डेले सञ्चार माध्यमसँग भने संस्थाग सुधार आफ्नो माग रहेको बताउँदै आएका छन् ।

तर डेपुटी गभर्नर गोपाल काफ्ले नेतृत्वको वार्ता टोलीसँग भने पाण्डेले आर्थिक माग पुरा नभएसम्म आन्दोलन जारी राख्ने बताउने गरेका छन् । उनकै अडानका कारण वार्ता अगाडि वढ्न सकेको छैन ।

केन्द्रीय बैंक ठप्प पारेको प्रति प्रमुख प्रतिपक्षी नेपाली कांग्रेसले सत्तारुढ दलसँग जवाफ माग गरेको छ । केन्द्रीय बैंकको आन्दोलन र अहिलेको नाकाबन्दी उस्तै रहेको भन्दै कांग्रेसले सत्तारुढ दलका तर्फबाट भएका यस्ता आन्दोलले एमालेलाई सोभा नदिने बताएको छ ।