काठमाडौं । नेपाल स्टक एक्सचेन्जमा मंगलबार करिब दुई करोड कित्ता सेयर थपिएका छन् । चार वटा बाणिज्य बैंक, एउटा माइक्रोफाइनान्स र एक इन्स्योरेन्स कम्पनीले बोनस सेयर सूचीकरण गरेका छन् । सूचीकरण भएपछि यी सस्थाका लगानीकर्ताले सेयर किनबेच गर्न पाउनेछन् ।
स्टक एक्सचेन्जले दिएको जानकारी अनुसार मेगा बैंकको २६ लाख नौ हजार ६ सय कित्ता, नेपाल एसविआई बैंकको ८२ लाख ५५ हजार चार सय ५८ कित्ता, एनसिसी बैंकको ३२ लाख ४५ हजार सात सय ६० कित्ता र सेन्चुरी बैंकको १९ लाख आठ हजार कित्ता बोनस सेयर सूचीकरण भएको छ ।
त्यस्तै समिट माइक्रोफाइनान्सको एक लाख ४७ हजार दुई सय कित्ता बोनस सेयर नेप्सेमा सूचीकृत भएको छ । एनएलजी इन्स्योरेन्सको पनि ६ लाख ८३ हजार एक सय कित्ता बोनस सेयर सूचीकरण भएको जानकारी नेप्सेले दिएको छ ।
मंगलबार नै तारागाउँ रिजेन्सी होटलले २१ लाख २१ हजार सात सय ५० कित्ता प्रिफेन्सियल सेयरलाई साधारण सेयरमा परिणत गरेर नेप्सेमा सूचिकरण गरेको छ । यो सेयर अब दोस्रो बजारमा कारोबार गर्न सकिने छ ।