संसद्को अर्थ समितिको शुक्रवार दूरसञ्चार सेवा प्रदायक एनसेलका विषयमा राखेको बैठकको सुरुमा नै दूरसञ्चार प्राधिकरण खारेज गर्नुपर्छ भन्ने प्रस्ताव राखेका फोरम लोकतान्त्रिकका सांसद् डा. सुवोधकुमार पोखरेलले नेपाल दूरसञ्चार प्राधिकरणका अध्यक्ष दिगम्वर झालाई विचौलिया भनेपछि समितिमा सन्नाटा छायो। पोखरेललको भनाई सकिन नपाउँदै झाले प्रतिवाद गरे।

झाको प्रतिवाद सकिन नपाउँदै पुनः पोखरेलले थपे ‘अन्य सेवा प्रदायकलाई अघि बढ्न नदिने तपाइकै पोलिसी हो। तपाई अरुका फाइल महिनौ अड्काउनुहुन्छ । एनसेलको कुरा आएमा राज्यका सवै संयन्त्र आफै प्रतिरक्षा गरेर हिड्नुहन्छ।’

बैठकपछि अर्थसमितिले यसअघि नै दिएको निर्देशनलाई निरन्तरता दिने निर्णय गरेको थियो। समितिको बैठकले एनसेलको पुँजी वृद्धि तथा नयाँ योजना रोक्न निर्देशन दिएको थियो। समितिको निर्देशन बमोजिम एनसेलले लाभकर नतिरेसम्म फोरजी सेवा समेत सुरु गर्न सक्दैन्।

समितिको जेठ २१ गतेको बैठकले निर्णय ३ मा एनसेलको स्वामित्व हस्तान्तरण विवादमा एनसेलबाट सम्पूर्ण कर असुली गरेसकेपछि मात्रै सो कम्पनीको पुँजी वृद्धि लगायतका थप व्यवसायिक योजना प्रस्तावहरु अघि बढाउन उद्योग मन्त्रालय तथा सूचना तथा सञ्चार मन्त्रालयलाई निर्देशन दिएको छ।

हेर्नुहोस समितिको निर्णय