काठमाडौं। नेपाल टेलिकमले सगरमाथा आरोहीहरुको गाँउ भनेर चिनिने दोलखा जिल्लाको बेदिङ्गमा विटिएस स्थापना गरी जिएसएम मोबाइल सेवा संचालनमा ल्याएको छ ।
बेदिङ्ग दोलखा जिल्लाको सबैभन्दा विकट मानिएको गौरीशंकर गाँउपालिका अन्तर्गत पर्छ । यो स्थान बहुचर्चित च्छो रोल्पा हिमताल निकट गौरीशंकर हिमालको फेदीमा रहेको छ र यहाँ शेर्पाहरुको बस्ती छ । पर्यटकीय आकर्षणको केन्द्र भएता पनि यो क्षेत्रमा यस अघि कुनै पनि किसिमको दूरसञ्चार सेवा पुगेको थिएन ।
यो सेवाबाट गौरीशंकर, नागुन तथा खेल्चाका करिब ८४ घरधुरीका करिव पाँच सय बासिन्दा तथा यस क्षेत्रमा आउने पर्यटकहरु लाभान्वित हुने कम्पनीको दाबी छ । बेदिङ्गको च्छोरोल्पा हिमताल सदरमुकाम चरिकोटबाट लगभग ६५ किलोमिटर सडक मार्ग र दुई दिनको पैदल मार्गको दुरीमा रहेको छ ।सेवा सुचारु भएपछि यस क्षेत्रका जनता निकै उत्साहित भएको कम्पनीले जनायो।