काठमाडौं । लक्ष्मी पूजाको दिन बिहानदेखि राति ७ बजेसम्म भक्तपुर अँध्यारो रह्यो। नेपाल विद्युत प्राधिकरणको भक्तपुर सबस्टेसन स्थित १३२/११ केभी २२.५ एमभिए ट्रान्सफरमरमा समस्या आएपछि विद्युत आपूर्ति बन्द भएको थियो। ट्रान्सफरमरको सर्किट ब्रेकरमा समस्या देखिनुको कारण थियो- मुसा।
मुसाका कारण ४५ एमभिए अन्तर्गत विद्युत आपूर्ति रोकिएको थियो। समस्या समाधानका लागि काममा तीब्रता दिन प्राधिकरण कार्यकारी निर्देशक कुलमान घिसिङ स्वयं साइटमा गएका थिए।
दिनभरको प्रयासपछि राति साढे ७ बजेदेखि बल्ल त्यहाँ विद्युत आपूर्ति सुचारु भयो।
लक्ष्मीपूजाको दिन विद्युतको माग अत्यधिक हुने भएकोले घिसिङ भक्तपुरबाट सीधै स्युचाटारस्थित भार प्रेषण केन्द्र पुगेका छन्। विद्युत माग, आपूर्ति र व्यवस्थापन मिलाउने कार्यालय यही हो।