हेटौँडा सिमेन्टको भाउ बोरामा १०३ रुपैयाँले बढ्यो, ५० किलो सिमेन्टलाई ९४० रुपैयाँ पर्ने

रासस
२०७४ पुष ३० गते १५:४९ | Jan 14, 2018
हेटौँडा सिमेन्टको भाउ बोरामा १०३ रुपैयाँले बढ्यो, ५० किलो सिमेन्टलाई ९४० रुपैयाँ पर्ने


हेटौंडा। सरकारी स्वामित्वमा रहेको हेटौँडा सिमेन्ट उद्योगले सिमेन्टको मूल्य बढाएको छ। कम्पनीले प्रति बोरा १०० रुपैयाँभन्दा केही बढी मूल्य वृद्धि गरेको हो। उद्योगका अनुसार अन्य सिमेन्टमा मूल्य बढेपछि मात्र हेटौँडा सिमेन्टले मूल्य बढाएको हो।
 
उद्योगको सञ्चालक समितिको बैठकले प्रतिबोरा सिमेन्टमा १०३ रुपैयाँ ३५ पैसा मूल्य वृद्धि गरेको हो। अहिले सिमेन्टको मूल्य भ्याटसहित प्रतिबोरा ९१२ बिक्री मूल्य पुगेको छ। उद्योगले यसअघि ५० केजीको बोराको सिमेन्ट उद्योगबाट डिलरलाई प्रतिबोरा ७९५ मा बिक्री गर्दै आएको थियो।  उद्योगले डिलरलाई दिँदै आएको कमिशनमा समेत वृद्धि गरेको छ।
 
प्रतिबोरा १० रुपैयाँ कमिशन दिँदै आएकामा अब १५ पुर्याएको छ। मूल्य वृद्धि गर्नुअघि उपभोक्ताले प्रतिबोरा ८३० मा सिमेन्ट खरिद गर्ने गरेकामा अहिले ९४० प्रतिबोरा सिमेन्टको मूल्य पुगेको  छ। ९४० रुपैयाँमा हेटौँडाका डिलरले सिमेन्ट बिक्री गरिरहेका छन्।
 
शिवम्, उदयपुरलगायत सिमेन्ट उद्योगले सिमेन्टको मूल्य वृद्धि गरेको र कच्चा पदार्थको मूल्य वृद्धि भएकाले बाध्य भएर हेटौँडा सिमेन्ट उद्योगले पनि मूल्य वृद्धि गर्नुपरेको सञ्चालक समितिका अध्यक्ष रघुरमण न्यौपानेले बताए।
 

Tata
GBIME
Nepal Life