काठमाडौं । वैदेशिक रोजगारीमा जाने कामदारको श्रम स्वीकृति निकाल्दा पेश गर्ने बीमाका काजगपत्र नक्कली भेटिन थालेपछि अनलाईनमा हेर्न मिल्ने व्यवस्था गर्नुपर्ने भएको छ । वैदेशिक रोजगार विभागले बीमा कम्पनीहरुलाई विभाग र सरोकारवाला व्यक्तिले अनलाईनमै हेर्न पाउने गरी विवरण राख्न निर्देशन दिएको हो । आगामी वैशाख १ गते देखि म्यादी बीमाको यस्तो विवरण अनलाईनमा राख्नु पर्नेछ । विभागमा सूचीकृत बीमा कम्पनीले फोटो सहित बहु विवरण देखिनेगरी अनलाईनमा राख्नु पर्नेछ ।
म्यादी बीमा गर्ने कामदारको कागजात हराउने र कतिपय बीमाको नक्कली कागजात पेश हुने गरेको भन्दै विभागले अनलाईनमा देखिने गरी विवरण राख्न निर्देशन दिएको हो । नक्कली कागजात पेश हुँदा पीडित पक्षले क्षतिपुर्ति पाउन समेत कठिन भएको कारण यस्तो नयाँ व्यवस्था गर्न लागेको विभागले जनाएको छ । यस्तो विवरण पाँच वर्षसम्मका लागि अर्काइभ बनाएर राख्नुपर्ने व्यवस्था पनि विभागले गरेको छ । पाँच वर्षसम्म विवरण खोज्न मिल्ने गरी राख्दा काजगात हराउने र पीडित पक्षले क्षतिपुर्ति नपाउने समस्या समाधान हुनेछ । विभागले वैदेशिक रोजगार कम्पनीहरुलाई पनि वीमा कम्पनीको अनलाईनमा राखिए अनुसारको काजगात मात्रै पेश गर्न निर्देशन दिएको छ । विभागबाट श्रम स्वीकृति लिन म्यादी बीमा गरेको कागजात पेश गर्नुपर्छ ।
कल्याणकारी कोषको पैसा बैंक मार्फत लिने
विभागले कल्याणकारी कोषको पैसा बैंकमार्फत मात्रै लिने भएको छ । एक जना कामदारले एक हजार रुपैयाँ यो कोषमा बुझाउनु पर्छ । कामदार पहिलो पटक जाँदा वा विदामा स्वदेश आएर फर्किदा यस्तो पैसा तिर्नुपर्छ । यस अघि यस्तो पैसा विभागले नै उठाउँदै आएको थियो । विभागले बैंकहरुलाई कल्याणकारी कोषको पैसा लिन कोटेशन मागेको छ । सात प्रतिसत भन्दा कम खराव कर्जा भएका क वर्गका बाणिज्य बैंकले कोटेशन भर्न पाउनेछन् ।