काठमाडौं । नेपालका लागि बेलायतका राजदूत एन्ड्रियु जेम्स स्पार्कसले विहीबार चौधरी ग्रुपको अवलोकन भ्रमण गरेका छन् । उनका साथमा बेलायत सरकारको अन्तर्राष्ट्रिय सहयोग विभाग (डिएफआईडी)का नेपालस्थित कार्यालयका उच्च अधिकारीहरु पनि सहभागी थिए ।
चौधरी ग्रुपका अध्यक्ष विनोद चौधरीले राजदूत स्पार्कस्लाई आफ्नो ग्रुपको कार्यालय, सानेपामा स्वागत गर्दै ग्रुपले अगाडि बढाएको नेपाल सोसल विजनेशको उद्देश्यका बारेमा जानकारी गराए ।
‘हामी धेरैभन्दा धेरै नेपाली युवाहरु उद्यमशिल बनुन् भन्ने चाहन्छौँ । त्यहि लक्ष्य हासिल गर्न नेपालमा सोसल विजनेशको अवधारणा कार्यान्वयनमा ल्याएका हौँ’, अध्यक्ष चौधरीले भने, ‘आम नेपाली नागरिकको जीवनस्तरमा सुधार ल्याउने बृहत लक्ष्यमा सहयोग पु¥याउनकै लागि सोसल विजनेशलाई प्रभावकारी बनाईदैछ ।’ अध्यक्ष चौधरीले विगत द्वन्दको दशकमा पनि चौधरी ग्रुपले नेपालमा विस्तार गर्दै लगेको लगानीका बारेमा जानकारी गराए ।
चौधरी ग्रुपले नवलपरासी जिल्लामा चौधरी उद्योग ग्राम स्थापना गरि सफलताका साथ संचालन गरिएको प्रति राजदुत स्पार्कस्ले सराहना गर्नुभयो र यस्ता उद्योग ग्राम देशका अन्य भागमा पनि स्थापना गरि मुलुकको सामाजिक आर्थिक विकास गर्नुपर्ने बताए ।              
उक्त अवसरमा चौधरी ग्रुपका प्रवन्ध निर्देशक निर्वाण चौधरीले सामाजिक उत्तरदायित्व सहित आफ्नो ग्रुप नेपालमा लगानी विस्तारका विभिन्न योजनाहरु कार्यान्वयन गरिरहेको जानकारी दिए । सो अवसरमा कार्यकारी निर्देशक वरुण चौधरीको पनि उपस्थित थिए ।