काठमाडौं। एकता बिकास बैंकको प्राथमिक सेयरमा मागभन्दा १५ गुणा बढि आवेदन परेको छ । चार दिनमै बैंकको सात लाख ३६ हजार कित्ता(सर्वसाधारणमा निष्कासित सात करोड ३६ लाख) को लागि एक अर्ब १३ करोड ५१ लाख रुपैयाँको आवेदन परेको हो । करिव २० हजार सर्वसाधारणले आवेदन दिएका हुन् ।
बैंकको बाँकी ६४ हजार कित्ता सेयरमध्ये २४ हजार कित्ता बैंकको कर्मचारी, ४० हजार कित्ता सेयर सामूहिक लगानी कोषको लागि वितरण गरिएको थियो । सेयर जारी पछि बैंकको चुक्ता पूँजी २० करोड पुग्ने छ । बैंकको अधिकृत पूँजी ४० करोड, जारी पूँजी २० करोड रहेको छ । बैंकले २०७१ असार मसान्त भित्र सेयर वाँडफाट गरी पूँजीकृती गर्ने लक्ष्य राखेको छ । सेयर निष्काशन प्रवन्धक एनएमबि क्यापीटल लिमिटेड हो ।
२०६८ कार्तिक ७ गतेवाट कारोवार आरम्भ गरेको बैंकको तीन जिल्लामा कार्य क्षेत्र रहेको छ । केन्द्रीय कार्यालय बुटवलमा रहेको बैंकले रुपन्देही, कपिलवस्तु र दाङमा सेवा दिइरहेको छ ।
सेयर निष्कासनलाई सहज बनाउन बैंकले आफ्ना सम्पूर्ण शाखाहरु, एनएमवि बैंकका देशभरी रहेका २१ वटा शाखाहरु, तिनाउ विकास बैंक, सेवा विकास बैंक र काठमाण्डौंका मर्चेन्ट बैंकिङ्ग कारोवार गर्ने संस्थाहरु गरी ४७ स्थानवाट शेयर आवेदनको व्यवस्था मिलाएको थियो ।
बैंले कपिलवस्तु जिल्लाको पिपरा, वनगाइ, चन्द्रौटा रुपन्देहीको देवीनगर, भैरहवा, केरवानी त्यसगरी दाङ जिल्लाको घोराही र तुलसीपुरमा शाखा विस्तार गरेको छ । हाल छ वटा शाखा, दुई वटा विस्तारित शाखा र प्रधान कार्यालय बुटवल सहित ९ स्थानवाट बैंकले सेवा दिइरहेको छ । बैंकको हालसम्म एक अर्ब २० कारोड निक्षेप र एक अर्ब कर्जा लगानी रहेको छ । स्थापना देखिनै नाफामा संचालित वैंकको निष्कृय कर्जा छैन । बैंकबाट करीव १७ हजार ग्राहकहरुले सेवा लिदै आईरहेको बताएको छ ।
