काठमाडौं। विहीवार बजार खुलेको २० मिनेटमै १८ अंकले बढेको नेप्से परिसूचक बजार बन्द हुँदा करिब १२ अंकको वृद्धिमा सिमित भएको छ । लगातार दुई दिन उच्च अंकले घटेको नेप्से परिसूचक अहिले त्यही रफ्तारमा बढ्ने क्रममा देखिएको छ ।
विहीवार पहिलो सत्रमा पनि त्यस्तो प्रवृत्ति देखिएको थियो । पहिलो सत्रमा बैंकिङ समूहको परिसूचक पनि १८ अंकले बढेको थियो । तर कारोबारको अन्त्य तिर बैंकिङ समूहको वृद्धि एक अंकमा सिमित भयो भने नेप्सेको वृद्धि पनि सात अंकमा सिमित भयो । बजार बन्द हुदा भने बैंकिङ समूहको सुचक पनि पाँच अंकले बढेको छ ।
बुधवार मूल्य बढेका एस डेभलपमेन्ट, कृषि बिकास , सिटिजन्स बैंक, डिप्रोक्स डेभलपमेन्ट, ओरियण्टल होटेल, यति डेभलपमेन्ट, युनाइटेड इन्स्योरेन्स, तिनाउ डेभलपमेन्ट, सुप्रिम डेभलपमेन्ट, सनराइज बैंक, शिखर इन्स्योरेन्स, एनएमबी बैंकको सेयर मूल्य विहीवार भने घटेको छ ।
संस्थापक सेयर सर्वसाधारणमा रुपान्तरण प्रक्रिया शुरु भएपछि सनराइज बैंकको सेयर मूल्य भने घटेको छ । बैंकको मूल्य २४ रुपैयाँले घटेको छ । बैंकको ४२ लाख कित्ता सेयरको वर्ग परिवर्तन गरिन लागेको हो ।
बीमा, होटेल र जलविद्युत् समूहको परिसूचक भने उच्चले बढेको छ । कारोबार रकमको आधारमा भने बैंकिङ समूहका कम्पनीहरुको नै अग्रस्थानमा छन । चिलिमे जलविद्युत् कम्पनीको करिब छ करोड रुपैयाँको कारोबार भयो । त्यसपछि भने सबैभन्दा धेरै रकमको कारोबार हुनेमा कुमारी बैंक, सिद्धार्थ बैंक, एभरेष्ट, एनसीसी, नेपाल, सिटिजन्स र नेपाल बंगलादेश बैंक रहेका छन । नेशनल लाइफ इन्स्योरेन्सको पनि करिब दुई करोड रुपैयाँको संस्थापक सेयर किनबेच भएको छ ।
नेशनल हाइड्रो, नागबेली लघुवित्त, गुराँस लाइफ, कास्कि फाइनान्स, बिराट लक्ष्मी बिकास, ज्योती बिकास, युनिक फाइनान्सको सेयर मूल्य नौं देखि १० प्रतिशतसम्म बढ्यो । नेशनल हाइड्रोको १० प्रतिशतले सेयर मूल्य बढेर सर्किट ब्रेक लाग्यो ।
यस दिन ६१ करोड रुपैयाँको नै सेयर कारोबार भयो । एक सय ४३ कम्पनीको १५ लाख ४५ हजार कित्ता सेयर किनबेच भयो ।