काठमाडौं। कारोबार खुलेदेखि नै घट्ने क्रममा रहेको बजारमा अन्त्यसम्म पनि सुधार हुन सकेन । नेप्से परिसूचक १६.३८ अंकले घटेको छ । करिब २० अंक बढिले घटेको बजार कारोबारको मध्यपछि भने सुधारको प्रयासमा देखियो ।
एक सय २८ कम्पनीको सेयर कारोबार भएकोमा १५ कम्पनीको मात्र सेयर मूल्य बढेको छ । आइतवार नै लाभांश घोषणा गरेका तिनाउ बिकास बैंकको सेयर मूल्य पाँच रुपैयाँले घट्यो तर गौमुखी बिकास बैंकको कारोबार भएन । गौमुखीको सुचीकरण भएको लामे समय हुँदा पनि पहिलो कारोबार भएको छैन । बैंकको गत साउन २७ गते नै सेयर सुचीकरण भएको थियो।
केही दिन देखि नौं प्रतिशतको दरले मूल्य बढिरहेको मिथिला लघुवित्त बिकास बैंकले आइतवार पनि निरन्तरता पाएको छ । युनाइटेड इन्स्योरेन्सको पनि सेयर मूल्य नौं प्रतिशतको दरमा नै बढेको छ ।
यस दिन ‘अन्य’ समूहको बाहेक सबै समूह घटेको छ । नेपाल टेलिकमको सेयर मूल्य नौं रुपैयाँले बढेपछि ‘अन्य’ समूहम सुधार भएको हो ।
आइतवार नै पब्लिक डेभलपमेन्ट बैंकले १२ प्रतिशत बोनस सेयर दिने घोषणा गरेको छ । बैंकले कर प्रयोजनको लागि समेत ०.६ प्रतिशत नगद लाभांश दिन भएको हो ।
दिवा अपडेटः
- नेप्से १५ अंकले घट्यो, सबै समूहको परिसूचकमा सुधार देखिएन
काठमाडौं। बजार खुलेको एक घण्टा नबित्दै नेप्से परिसूचक ९.०७ अंकले घटेको छ । कारोबारमा ६४ कम्पनी आएपनि छ कम्पनीको मात्र मूल्य बढ्यो। यो अवधिमा चार करोड रुपैयाँको मात्र सेयर कारोबार भयो । बुक क्लोज नजिकिएका चिलिमे जलविद्युत्, ग्लोबल आइएमइको सेयर मूल्य समेत बढेको छैन । करोबार रकमको आधारमा भने यी दुई अग्रस्थानमा छन ।
मिथिला लघुवित्त, एभरेष्ट इन्स्योरेन्स, कन्ट्रि डेभलपमेन्ट, मुक्तिनाथ बिकास, युनाइटेड इन्स्योरेन्स र हिमालयन बैंकको मात्र सेयर मूल्य बढेको छ ।
दुई ब्रोकर कम्पनी आइतवार कारोबारबाट आउट भएका छन । अरुण सेक्युरिटिज (ब्रो.३) र आशुतोष ब्रोकरेज (ब्रो.८) ले राफसाफको लागि प्रमाण पत्र बुझाउन ढिलाई गरेकोले कारोबार रोक्का गरिएको हो ।