सविन मिश्र/बिजमाण्डू
काठमाडौं । नेपाल आयल निगमले (एनओसी)यो महिना नाफा कमाएको छ । सँधै नोक्सानमा गएर आपुर्तिमा समस्या देखिने निगम यस पटक भने निकै नाफा कमाउन सफल भएको हो । अन्तर्राष्ट्रिय बजारमा कच्चा तेलको मुल्य घटेपछि आयल निगमलाई राहत पुगेको हो ।

अहिले कच्चा पेट्रोलियम पदार्थको मुल्य ९६ अमेरिकी डलरको हाराहारीमा छ । यही मुल्यका आधारमा भारतीय आयल निगम(आइओसी)ले एनओसीलाई अक्टोवर एक तारिक नयाँ मुल्य सुची पठाएको हो । आइओसीको नयाँ मुल्य सूची अनुसार एनओसीलाई ग्याँस बाहेक अन्य सबैमा उच्च नाफा छ ।

एनओसीले पेट्रोलियम पदार्थको मूल्य स्वचालित रुपमा घटबढ हुने गरी ‘अटोमेशन प्रणाली’ लागु गरेपनि यसपटक भने मूल्य हेरफेर गरेको छैन । एनओसीले असोज १३ गतेबाट नयाँ प्रणाली लागु गरेपनि यसपटक भने पेट्रोलियम पदार्थको मूल्य घटबढ गरेन । अन्तर्राष्ट्रिय बजारमा मुल्य परिवर्तन हुनासाथ नेपालमा पनि मुल्य घट्बढ हुनुपर्ने हो ।

एनओसीले अक्टोबर १ मा सार्वजनिक गरेको नयाँ मूल्यसूचीमा पेट्रोलियम पदार्थको मूल्य यसअघि सेप्टेम्बर १६ मा तोकिएकै बराबर छ । एनओसीका प्रबन्ध निर्देशक चण्डिकाप्रसाद भट्टले प्रत्येक १५ दिनमा पेट्रोलियम पदार्थको मूल्य परिवर्तन गर्ने तयारी गरेपनि यसपटक भने नगरिएको बताए ।

‘हामीले यसअघि प्रत्येक १५ दिनमा मूल्य परिवर्तन गर्ने भनेको थियौं,’ भट्टले भने, ‘यस पटक भने गरेका छैनौं र छिट्टै नै मूल्य हेरफेर हुन्छ ।’ भट्टले मूल्य हेरफेर गर्ने दिन एनओसीको सञ्चालक समितिको बैठकले तोक्ने भन्दै सञ्चालक समितिको बैठक बसेपछि मात्रै मूल्य परिवर्तनको मिति टुंगो लाग्ने जानकारी दिए ।

‘हामीले हरेक महिनाको १ र १६ तारेखमा मूल्य परिवर्तन गर्ने सोच बनाए पनि अब त्यसो हुँदैन,’ भट्टले भने, ‘महिनाको दुई पटक मूल्य परिवर्तन हुन्छ, तर त्यसको मिति भने टुंगो लाग्न बाँकी छ ।’ आइओसीले एनओसीलाई प्रत्येक महिनाको दुई पटक नयाँ मूल्य सूची पठाउने गरेको छ । एनओसीले पनि त्यसै अनुरुप अटोमेशन प्रणाली लागु गरेको थियो ।

एनओसीले यसअघि पेट्रोलियम पदार्थको परल मूल्यमा थोरै नाफा जोडेर बेच्ने तयारी स्वरुप नयाँ प्रणाली लागु गरेको थियो । अटोमेशनमा गएको पहिलो पटक नै निगमले पेट्रोल, डिजेल तथा मट्टितेलको मूल्य घटाएको थियो ।

यस्तो छ निगमलाई नाफा
एनओसीलाई अक्टोबर महिनामा २६ करोड १४ लाख रुपैयाँ खुद मुनाफा हुने प्रक्षेपण गरेको छ । एनओसीले सार्वजनिक गरेको पेट्रोलियम पदार्थको नयाँ मूल्यसूची अनुसार नाफा प्रक्षेपण गरेको हो । सेप्टेम्बरमा चार करोड ६७ लाख रुपैयाँ नोक्सान व्यहोरेको एनओसीले यो महिना भने नाफाको प्रक्षेपण गरेको छ ।

नयाँ मूल्य अनुसार पेट्रोलमा १२ रुपैयाँ ६७ पैसा नाफा छ । सेप्टेम्बरमा पेट्रोलमा १२ रुपैयाँ ६ पैसा नाफा थियो । यस्तै डिजेलमा तीन रुपैयाँ १९ पैसा नाफा छ । सेप्टेम्बरमा निगमलाई डिजेलमा प्रति लिटर ८३ पैसा मात्रै नाफा थियो ।

यस्तै निगमले खाना पकाउने ग्यासमा व्यहोर्दै आएको चर्को नोक्सान पनि केही कम भएको छ । अघिल्लो महिना प्रति सिलिण्डर पाँचसय ५३ रुपैयाँ ६ पैसा नोक्सान ब्यहोरेको निगमलाई यो महिना ग्यासमा प्रतिसिलिण्डर पाँचसय ११ रुपैयाँ २८ मात्रै नोक्सान हुनेछ ।