वीरगंज।साना व्यवसाय,परामर्श तथा तालिम केन्द्र श्रीपुर वीरगंजले  तीन महिने गलैँचा बुनकर तालिम सञ्चालन गरेको छ । नेपाल सरकार शिक्षा मन्त्रालय ईभेन्ट परियोजना अन्तर्गत सर्लाहीको लालबन्दी नगरपालिका वडा नं १६ परवानीपुरको तीनघरे र बागमती नगरपालिकामा ४० जना गरी १०० जनाको लागि तालिम आयोजना भएको हो ।

केन्द्रका कार्यकारी निर्देशक विजय श्रीवास्तवका अनुसार तीनघरे टोलमा २०/२० जनाको तीन वटा समुह बनाई वैशाख ५ गते देखि घरमै बसेर फुर्सदको समयलाई सदुपयोग गर्ने गरी विहान १० बजे देखि ४ बजेसम्म विपन्न वर्गका महिलाहरुको लागि यस्तो तालिम आयोजना भएको हो ।

विपन्न वस्ती तीनघरेमा दलित, जनजाती तथा पिछडिएका महिलाहरुको छनौट गरी शुरु गरिएको तालिममा उत्साहप्रद सहभागीता रहेको प्रशिक्षक शेर बहादुर योञ्जनले बताए । अन्तराष्ट्रिय स्तरमा नेपाली गलैँचाको माग दिनप्रतिदिन बढदै जाँदा विपन्न महिलाहरुलाई आत्मविश्वासी र स्वरोजगार बनाउन तालिमको उदेश्य रहेको उनले बताए ।

उनले करिब अढाई महिना तालिम सकेको र अबको १५ दिनपछि महिलाहरुले गलैँचा बुन्ने अर्डर पाउने बताए । शुरुमा कठिन लागेको तालिम सिक्दै जाँदा गलैँचा बुन्ने काम सहज लाग्न थालेको सहभागी खिल कुमारी कार्कीले बताइन्।

घरपरिवारमा आम्दानी बढाउन र छोराछोरी पढाउँदै केही गर्ने सोचले तालिममा सहभागी भएको उनको भनाई छ । गलैँचा बुन्ने सीप सिकेर १५ दिनमा ९ हजार मज्जाले कमाउन सकिने प्रशिक्षकको योञ्जनले प्रष्ट पारे ।

९० सेन्टिमिटर चौडा  र २ सय सेन्टिमिटर लम्बाईको १ पिस गलैँचाको नेपालमा ९ हजार ज्यालादारी पाउँछ, एक पिस गलैँचा बुन्न करिब १५ दिन लाग्छ,उनले भने ।

गलैँचा उद्योगले घरमै बुनेको गलैँचा खरिद गर्ने गरेकोले बजारको झन्झट पनि नरहेको उनले बताए । गलैँचा बुन्ने मेशिन, औजार तथा कच्चा पदार्थ सबै गलैँचा उद्योगहरुले सम्झौता अनुसार नै उपलब्ध गराउने गर्छ ।

यसैबीच, तीनघरेमा संस्थाले २० जनाको लागि सिलाईकटाई तालिम पनि सञ्चालन गरेको बताएको छ।सिलाई कटाई तालिमबाट पनि ग्रामीण भेगका महिलाहरुलाई आत्मनिर्भर एवं स्वरोजगार बनाउने संस्थाको लक्ष्य छ ।