काठमाडौं।पुल्चोक इन्जिनियरिङ कलेजमा अध्ययन गरेका पाँच युवा र व्यवस्थापन पढेका दुर्इ युवा मिलेर पाइला टेक्नोलोजी कम्पनी खोले।कम्पनीले रोबोट बनाउन सुरु गर्यो।
उनीहरुले बनाएको रोबोट 'परि' नेपाल एसबिआर्इ बैंकले किन्यो।दरबारमार्गमा रहेको पहिलो स्मार्ट शाखामा रोबोट परिले कस्टुमर सर्भिसको काम गर्छिन्।बैकिङ क्षेत्रमा प्रयोग गर्ने रोबोट तयार भएपछि उनीहरु होटल,रेष्टुरेन्टमा प्रयोग गर्न मिल्ने रोबोट बनाउन हौसिए।उनीहरु यो क्षेत्रमा हौसिनुको कारण थियो-सबैभन्दा बढी 'स्कोप'।अहिले होटल र रेष्टुरेन्टमा कामदारको लफडा सबैभन्दा बढी हुन्छ।अझ दक्ष कामदार पाउन कठिननै।
रेष्टुरेन्ट खोल्दा आम्दानीको स्रोत पनि हुने र रोबोट बेच्ने माध्यम पनि बन्ने।रेष्टुरेन्टको योजना बनाएपछि उनीहरुलेे यसका लागि प्राइम लोकेसन आवश्यक हुने देखे।त्यसपछि प्राइम लोकेसन दरबारमार्गमा ठाउँ खोजी गर्न थाले।दरबारमार्गमा उनीहरुले भनेको जस्तै ठाउँ भेटे र दिनरात नभनी उनीहरुले दरबारमार्गमा इन्टेरियर डिजाइन गरे।उनीहरुले रेष्टुरेन्टको नाम राखे-नौलो।
केही महिनाको मेहनतलेे बिहीबार रंग ल्यायो। बिहीबार यो रेष्टुरेन्टको शिक्षा तथा प्रविधिमन्त्री गिरिराज मणि पोखरेलले उद्घाट्न गरे। लामो प्रयासपछि रेष्टुरेन्ट खोल्न सकेकोमा उनीहरु खुशी मात्रै थिएनन् यसबाट आफ्नो सिर्जनाको सदुपयोग भएकोमा गर्व महशुस गर्दै थिए। रोबोट बनाउनेमध्येका एक रविन भन्छन्-‘हामीले उत्पादन गरेको रोबोटले रेष्टुरेन्टमा खाना सर्भ गर्छ।हामीले रेष्टुरेन्ट क्षेत्रमै नयाँ प्रयोग गरेका छौं।यसले रेष्टुरेन्टको व्यापार बढ्छ।हामीले उत्पादन गरेको रोबोटको समेत बजारीकरणका लागि बाटो खोल्छ भन्नेमा विश्वस्त छौं।’
यो रेष्टुरेन्टमा कागजी मेनु छैन।टेबुलमा डिजिटल प्रविधिमार्फत खानाको अर्डर गर्न सकिन्छ।‘टेबलमा मेनु देखिन्छ, क्लिक गरेपछि अर्डर हुन्छ,उनले भने, ‘खाना सबै रोबोटले सर्भ गर्छ।‘उनीहरुले रोबोटको नाम राखेका छन् जिन्जर र फेरी।जिन्जरले खाना सर्भ गर्छ भने फेरीले पानी,जुश लगायतका पेय पदार्थ सर्भ गर्छ।
रेष्टुरेन्टमा ७० भन्दा बढी नेपाली रैथाने खाना र कन्टिनेन्टल परिकार छन्। 'हामीले रोबोट राखेर रेष्टुरेण्ट व्यवसायलाई मात्र केन्द्रीत गरेका होइनौँ। हाम्रो मूल उद्धेश्य भनेको सर्वसाधारणलाई रोबोटमार्फत सेवा दिनुका साथै नेपाली खानाको प्रवर्द्धन गर्नु पनि हो।' गिरिले भने।