काठमाडौं। नेपाल राष्ट्र बैंकले बैंक तथा बित्तीय संस्थाका प्रमुख कार्यकारी अधिकृतहरुका लागि कुलिङ पिरियडको अवधि बढाउने भएको छ। डेढ बर्षअघि पहिलो पटक कुलिङ पिरियड ६ महिनाको हुने ब्यवस्था गरेको थियो।

अब यसलाई बढाएर १ बर्षको बनाउने तयारीमा राष्ट्र बैंक छ। प्रमुख कार्यकारी अधिकृतहरु जुनसुकै कारणले आफ्नो सेवाबाट निबृत्त भएपछि कम्तिमा ६ महिना अवधि बाहिर रहेर मात्र फेरि बैंकमा फर्किन पाउने अहिलेको ब्यवस्था छ।

राष्ट्र बैंकले प्रमुख कार्यकारीहरुलाई कुलिङ लगाएपछि उपल्लो दर्जाका कर्मचारी र सञ्चालक समितिलाई पनि कुलिङ पिरियडको ब्यवस्था गरेको छ।

राष्ट्र बैंकले ६ महिनाको कुलिङ हुँदा प्रमुख कार्यकारीहरुले चलखेल अझ तिब्र पारेको भन्दै त्यसलाई बढाउने तयारी गरेको हो। एउटा बैंकमा जागिर सकिन लाग्दा अर्को बैंकमा आफ्नो जागिर मिलाउने चलखेल हुने गरेको र ६ महिनाको ब्यवस्थाले गर्दा अर्को बैंकले पनि पर्खिने गरेको पाइएको राष्ट्र बैंकका अधिकारीहरुको भनाइ छ। 'त्यसैले एक बर्ष हुँदा उनीहरुलाई चलखेल गर्ने समय हुँदैन' ती अधिकारीले भने।