अल्पकालीन लगानीकर्ता हावी हुँदा शेयर बजारमा नागबेली चाल, सूचकसँगै कारोबार रकम समेत सुध्रियो

बिजमाण्डू
२०७६ मंसिर २४ गते १५:३२ | Dec 10, 2019


काठमाडौँ। लगातार पाँच कारोबार दिनदेखि बढेको शेयर बजार मंगलबार समेत निरन्तरता पाएको छ। नेपाल स्टक एक्सचेन्जको कारोबार मापक सूचक २.४८ अंकले बढेर ११५१.३६ अंकमा उक्लिएको छ ।

Tata
GBIME
Nepal Life

अल्पकालीन लगानीकर्ता हावी हुँदा मंगलबार सामान्य अंकको वृद्धि देखिएको हो । लगानीकर्ताले छोटो समयको नाफा सुरक्षित गर्दा मंगलबार शेयर कारोबारमा नागबेली चाल देखिएको थियो ।

कारोबारको सुरुवाती आधा घण्टामा नौ अंक बढेको शेयर बजार त्यसपछि भने घट्दो लयमा देखिएको थियो । साढे १२ बजेपछि बिस्तारै बढेको बजार पुनः १ बजेपछि घट्दो लयमा देखिएको थियो । कारोबारको अन्तिम समयमा बजार सुधारिँदा सूचक दुई अंकले बढेको हो ।

लगानीकर्ताले लगातार नेप्सेमा वृद्धि हुँदा मंगलबार नाफा सुरक्षित गर्ने प्रयास गरेको एक ब्रोकर कम्पनीले जनाएको छ । उसका अनुसार कारोबारको बीचमा लगानीकर्ताले बिक्री चाप बढाएका थिए।

कारोबारमा सुधार हुँदै जाँदा त्यसको असर कारोबार रकममा समेत देखिन थालेको छ । मंगलबार आधा अर्ब रूपैयाँको शेयर कारोबार भयो । सोमबारभन्दा कारोबार रकम चार करोड रूपैयाँले बढेको हो । मंगलबार ४६ करोड रूपैयाँ बराबरको शेयर कारोबार भएको थियो ।

मंगलबार १ सय ७० कम्पनीका शेयर कारोबार भए । जसमा ७५ कम्पनीको शेयर मूल्य बढेको छ भने ६६ कम्पनीको शेयर मूल्य घटेको छ । १७ कम्पनीको मूल्यमा कुनै परिवर्तन भएन । माछापुच्छ्रे बैंकको सबैभन्दा बढी शेयर कारोबार भयो ।

उसको मात्रै सात करोड रूपैयाँ बराबरको शेयर कारोबार भएको हो । कारोबार रकमकै आधारमा एनएमबि बैक दोस्रो भएको छ । उसको ३ करोड ८५ लाख रूपैयाँ बराबरको शेयर कारोबार भयो ।

कारोबारमा आएका कम्पनीहरूको उपसूचक मिश्रित देखिएको छ । १२ समूहको शेयर कारोबारमा आठ समूहको उप-सूचक बढेको छ । चार समूहको उप-सूचक घटेको हो । सबैभन्दा बढी ट्रेडिङ समूहको ४.९७ प्रतिशतले बढेको हो । अन्य समूह १.६८ प्रतिशतले घटेको छ ।