काठमाडौं। कोरोना भाइरस संक्रमणका कारण अर्थतन्त्र संकटमा पर्न थालेपछि बैंकहरुले ऋणको ब्याज घटाउन निक्षेपको ब्याज झार्ने निर्णय गरेका छन्।
डेढ बर्ष पुरानो भद्र सहमतिलाई पुनरावलोकन गर्दै बैंकर्स संघले आधार दर बैशाख १ गते नै प्रकाशित गर्ने निर्णय गरेका छन्।
बैंकहरुले आधार दर कम गराउन ब्यक्तिगत मुद्दति, संस्थागत मुद्दति र बचतको ब्याज दर घटाएका छन्। आधार दरमा पनि ६ प्रतिशतसम्म प्रिमियम लिन पाउने सहमतिलाई पाँच प्रतिशतमा झारेका छन्।
बैंकहरुले ब्यक्तिगत मुद्दतिको ब्याज दर ८.७५ प्रतिशतमा झारेका छन्। संस्थागतको ८.५ प्रतिशत र नवीकरण गर्दा ८.६ प्रतिशतमा गर्नु पर्ने ब्यवस्था गरेका छन्। यसअघि ब्यक्तिगतको ९.७५ प्रतिशत, संस्थागतको ९.५ र नवीकरणमा ९.६ प्रतिशत ब्याज थियो।
बचतको ब्याज साढे ५ प्रतिशतमा झार्ने सहमति भएको छ। यसअघि साढे ६ प्रतिशत अधिकतम ब्याज थियो।
निक्षेपको ब्याज दर भोलिबाटै घट्ने छ भने ऋणको बैशाख १ गतेबाट घट्ने छ।