काठमाडौं। आइतबार सेयर बजारमा एक अर्ब रुपैयाँ माथिको कारोबार भएको छ। उतारचढावमा रहेको सेयर बजार अन्त्यमा ९.०२ अंक घटेर १३४०.२९ बिन्दुमा पुगेर बन्द भयो ।
कारोबार भएको आधा घण्टामा निरन्तर उकालो लागेर १३५१ बिन्दुसम्म पुगेको सुचक डेढ घण्टामा नै १३३३ बिन्दुसम्म ओर्लिएको थियो ।
आइतबार १ सय ७९ कम्पनीको १ अर्ब ११ करोड रुपैयाँको कारोबार भएको छ । कारोबार भएको सवा एक घण्टामा २८ करोडको हाराहारीमा मात्र सेयर कारोबार भएको थियो भने २ बज्नुअघि ७० करोडको कारोबार भइसकेको थियो । कारोबार भएको दुई घण्टाको बीचमा कारोबार रकम एकैपटक बढ्न पुगेको थियो । सो अवधिमा नेप्से सूचक पनि तलबाट माथितिर गएको थियो ।
आइतबारको कारोबारमा बैंकको सूचक घट्दा पनि बीमा र लघुवित्तका सूचक बढेकाले लगानीकर्ता बैंक छाडेर बिमा र लघुवित्तका सेयरमा बढी आकर्षित भएको देखिन्छ । आर्थिक वर्ष समाप्त हुन लागेको छ । बीमा र लघुवित्तका क्षेत्रका कम्पनीहरुले यस आवमा कमाएको नाफाबाट छिटै लाभांश घोषणा गर्ने भएकाले लगानीकर्ता ती कम्पनीका सेयरमा आकर्षित भएको एक लगानीकर्ताले बताए ।
यस दिन नेपाल लाइफ इन्स्योरेन्सको सबैभन्दा बढी १६ करोडको सेयर कारोबार भएको छ । सेयर मूल्य बढ्नेमा सूर्योदय लघुवित्त छ भने घट्नेमा तिनाउ मिसन डेभलपमेण्ट बैंकको सेयर छ ।