निषेधाज्ञा खुकुलो भएसँगै सिमरा–काठमाडौं उडानमा यात्रुको चाप बढ्दो, दैनिक १८ सयले यात्रा गर्दै

बिजमाण्डू
२०७८ साउन १४ गते १२:०९ | Jul 29, 2021

Tata
GBIME
Nepal Life

वीरगंज। निषेधाज्ञा खुकुलो भएसँगै सञ्चालनमा आएको आन्तरिक उडानले गर्दा हवाईमार्गबाट सिमरा–काठमाडौं आवतजावत गर्नेहरुको चाप बढ्दै गएको छ ।

पछिल्लो समय दैनिक १६ सयदेखि १८ सयजनाले सिमरा–काठमाडौं हवाईयात्रा गरिरहेको बताइएको छ । सिमरा नागरिक उड्डयन कार्यालयका प्रमुख वसन्त गौतमका अनुसार अहिले दैनिक विभिन्न कम्पनीको १२ वटा हवाई उडान भइरहेको बताए ।

बुद्ध एयरको १९ सिटे, ४२ सिटे गरी एक एक उडान, ७२ सिटको ६ वटा उडान, यती एयरलायन्सको ७२ सिटको तीनवटा उडान र श्री एयरलाइन्सको ८० सिटको एउटा उडान गरी कुल १२ वटा उडान भइरहेको उनले जानकारी दिए ।

निषेधाज्ञाको कारण काठमाडौं र वीरगंज आसपासमा रोकिएका यात्रीहरु सहज रुपमा र छिटो काठमाडौं–सिमरा पुग्न हवाई यात्रा रोजिरहेको उनको विश्लेषण छ ।

उपचार, व्यवसाय, व्यापार, काम विशेषलगायत प्रयोजनका कारण हवाई मार्गबाट यात्रा गर्नेहरुको चाप बढेको उनले बताए ।

असार १७ गतेदेखि खुलेको आन्तरिक उडान पछि वर्षा र बाढी पहिरोको कारणले पनि अधिकांश यात्रीहरु हवाईजहाजबाट नै काठमाडौं यात्रा गरिरहेका छन् ।

अहिले सिमरा–काठमाडौंको भाडा विभिन्न कम्पनीको रु २९ सयदेखि ३ हजारसम्म रहेको उनले बताएका छन् ।

यात्रुको चाप बढेसंगै विमान कम्पनीहरुले करीब एक महिनादेखि भाडा तीन हजारकै हाराहारीमा रहेको छ  जबकी एकसमय भाडादर घटेर  काठमाडौं सिमरा उडान गर्दा जम्मा  १३ सयदेखि १७ सयसम्म  कायम रहेको  थियो ।