काठमाडौ। ब्याजदर वृद्धिको विरोधमा व्यवसायीहरु सडकमा उत्रिएपछि नेपाल उद्योग वाणिज्य महासंघ राष्ट्र बैंक पुगेको छ। व्यवसायीहरुको माग सम्बोधन गरिदिन महासंघका अध्यक्ष सोमबार राष्ट्र बैंक पुगेका हुन्।
ब्याजदर वृद्धिको विरोधमा सुर्खेतलगायतका जिल्लाहरुका व्यवसायी आन्दोलित बनेपछि महासंघले राष्ट्र बैंक गुहारेको हो।
महासंघले वित्तीय क्षेत्रका समस्या यथाशीघ्र समाधान गर्न राष्ट्र बैंकको ध्यानाकर्षण गरेको छ। महासंघका अध्यक्ष गोल्छा नेतृत्वको टोलीले राष्ट्र बैंकका कार्यवाहक गभर्नर डा. निलम ढुंगानासहितका उच्च अधिकारीहरूलाई भेटेर उक्त आग्रह गरेको हो।
‘नेपालको निजी क्षेत्र सम्भवतः हालसम्मकै कठिन अवस्थाबाट गुज्रिरहेको छ,' अध्यक्ष गोल्छाले भने, ‘ब्याजदर स्थायित्व चालु पूँजी कर्जा सम्बन्धी नयाँ व्यवस्थाको स्थगन आदि उपायका माध्यमबाट केन्द्रिय बैंकले निजी अर्थतन्त्र चलायमान बनाउनु पर्छ।’
भेटका क्रममा कार्यवाहक गभर्नर ढुंगानाले महासंघका सुझाव अध्ययन गरि समाधानका उपाय खोजिने बताइन्।
