सविन मिश्र/बिजमाण्डू
काठमाडौं । अर्थमन्त्री डा. रामशरण महतले बैंक तथा वित्तीय सस्थाको पुँजी बृद्धि गर्ने निर्णय उपयुक्त भएको भन्दै नेपाल राष्ट्र बैंकको पक्षमा दरोसँग उभिएका छन् । उनले संसदीय समितिले पुँजी बृद्धिका विषयलाई राष्ट्र बैंकलाई कुनै पनि निर्देशन दिन नहुने बताएका छन् ।
(3).jpg)
विहीबार समितिको बैठकमा उपस्थित भएका अर्थमन्त्री डा. महतले राष्ट्र बैंकले लामो अध्ययन पछि पुँजी बृद्धिको निर्णय गरेकोले यसमा हस्तक्षेप गर्न नहुने बताए ।
राष्ट्र बैंकले अध्ययन गरेर पुँजी बृद्धिको निर्णय गरेको कारण अन्य सबै सरोकारवाला पक्षले निर्णय कार्यान्वयनका लागि सहयोग गर्नुपर्ने अर्थमन्त्रीले बताए । केन्द्रीय बैंकले यथार्थता बुझेर पुँजी बृद्धिको निर्णय गरेकाले समितिले पुँजी बृद्धिको निर्णय फिर्ता लिन निर्देशन दिन नहुने बताएका छन् ।
'व्यवहारिक कठिनाई केही भए त्यो समाधान गरिदिनुपर्छ,' मन्त्री महतले भने, 'तर पुँजी वृद्धिको निर्णय फिर्ता लिन निर्देशन दिनुपर्छ भन्ने जुन कुरा छ यो केन्द्रीय बैंकको स्वायत्ततामाथिको हस्तक्षेप हो ।' महतले संसदले प्रजातान्त्रिक पद्धतिको अभ्यास गर्ने भन्दै अर्काको क्षेत्राधिकारमा हस्तक्षेप गरे त्यसले अराजकता निम्तनेसमेत बताए ।
बैठकको सुरुमै समिति सदस्य सभासद् इच्छाराज तामाङले पुँजी बृद्धिको निर्णय फिर्ता लिन निर्देशन दिनुपर्ने प्रस्ताव गरेका थिए । उनले पुँजी वृद्धिको प्रस्ताव अनुचित भएको समेत बताए । सभासद् तामाङ सिभिल बैंक सञ्चालक समितिका अध्यक्ष पनि हुन् ।
पुँजी बृद्धिकै कारण उनको बैंक अर्कोसँग गाभिएर अस्तित्व समाप्त हुने डरले तामाङले नै यो मुद्धा संसदमा पुर्याएका हुन् ।
सभासद तामाङलाई समर्थन गर्दै पूर्वअर्थमन्त्री भरतमोहन अधिकारीले राज्य पुनर्निमार्णमा लाग्नुपर्ने बेलामा राष्ट्र बैंकले पुँजी बृद्धिको निर्णय गरेको भन्दै आलोचना गरे । उनले भने, ‘पुँजी बृद्धि गर्न यो समय ठीक होइन, टाइमिङ मिलेन ।’
